सुर्खेत । भौतिक यातायात तथा पूर्वाधारमन्त्री  प्रकाश ज्वालाले भष्ट्राचार निरुत्साहित गर्दै अगाडि वढ्नुपर्ने  वताउनुभएको छ । 

एकीकृत समाजवादी पार्टीका उपमहासचिव समेत रहनुभएका मन्त्री ज्वालाले बुधबार समाजवादी प्रेस सगंठन नेपाल कर्णालीको प्रथम अधिवेशनलाई सम्बोधन गर्दै अहिले मुलुक नै आर्थिक मन्दीको मारमा रहेको र त्यसको असर संचार क्षेत्रमा बढी परेको उल्लेख गर्नुभयो । 

मन्त्री ज्वालाले समाजवादी समाजवादी प्रेस सगंठनमा आवद्धसहित सबै पत्रकारलाई जनपक्षीय बन्न सुझाव दिनुभएको छ । ‘तपाईहरु जनपक्षीय बन्नुस्’ उहाँले भन्नुभयो– ‘पत्रकारको प्रगति र पक्षमै पार्टी हिजो पनि थियो, अहिले पनि छ र भोलि पनि रहन्छ ढुक्क हुनुस् ।’

समाजवादी प्रेस सगंठनका अध्यक्ष विश्वमणि सुवेदीले पत्रकारिता सुधार्नका लागि पहिला पत्रकार नै सुध्रिनुपर्ने बताउनुभयो । ‘हामी पत्रकारहरुमा पनि केही समस्या छन्’ उहाँले भन्नुभयो–  जसका कारण मिडियाप्रति नागरिकको विश्वसनीयता घटदै गएको छ । त्यसकारण हामी पहिला सुध्रिनुपर्छ ।’