मुग्लिन । सुन्तला उत्पादन गर्ने किसानलाई प्रोत्साहन गर्ने उदेश्यले चितवनको इच्छाकामना गाउँपालिकाले पुषको मध्यतिर सुन्तला महोत्साव गर्ने भएको छ ।  सुन्तला खेती गर्ने किसानलाई प्रोत्साहनका लागि गाउँपालिकाले महोत्सवको आयोजना गर्न लागिएको गाउँपालिका अध्यक्ष दानबहादुर गुरुङले बताउनुभयो । 

आफ्नो क्षेत्र भित्रका अधिक सुन्तला उत्पादन गर्ने किसानलाई प्रोत्साहन गर्न यस पटक सुन्तला महोत्सव गर्न यही पुसको दोस्रो वा तेस्रो हप्तामा ३ देखि ५ दिनसम्मको महोत्सव गर्न लागिएको गाउँपालिका अध्यक्ष गुरुङले बताउनुभयो ।महोत्सवका लागि किसानसँगै छलफल गरिरहेको उहाँले जानकारी दिनुभयो । 

अध्यक्ष गुरुङले भन्नुभयो, “महोत्सवको तयारीका लागि किसानसँग छलफल गरिरहेका छौँ, महोत्सवले इच्छाकामनाको सुन्तलाको प्रचारप्रसार एवं बजार प्रवद्र्धन गर्न सहयोग पुग्छ ।” गाउँपालिकाको वडा नं ३ स्थित माझगाउँ, सिरानगाउँ, तोक्दाङ, ढाप, डुडेलगायत गाउँका करिब तीन सय बिघा भन्दाबढी जग्गामा सुन्तला खेती हुने गरेकाले  महोत्सव गर्न  लागिएको हो । 

महोत्सवमा पाहुनालाई आकर्षण गर्न बोटमै टिपेर सुन्तला खानपाउने, सुन्तला कसले धेरै खाने प्रतियोगिताका साथै  बजारमा भन्दा सहुलियत मूल्यमा ताजा सुन्तलाको स्टल राखिनेजस्ता क्रियाकलाप गरिने उहाँले बताउनुभयो ।