काठमाडौँ । पूर्व शिक्षा, विज्ञान तथा प्रविधि मन्त्री सुमना श्रेष्ठले सत्य र न्यायका लागि पार्टीको सदस्यता त्याग्न शिक्षकहरूलाई आग्रह गर्नुभएको छ । 

शिक्षकहरूमाथि प्रहरीले बल प्रयोग गरेपछि सामाजिक सञ्जालमा स्टाटस लेख्दै उहाँले सत्य र न्यायको पक्ष लिन पार्टीको सदस्यता त्याग्न अनुरोध गर्नुभएको हो ।  उहाँले शिक्षकहरुलाई विधिसम्मत बस्ने कि अझै पनि कुनै राजनीतिकर्मी वा पार्टीको छत्रछायामा बसिरहने भन्ने विषयमा छान्न अनुरोध गर्नुभएको छ । 

बुईमा चढाएर सत्तामा पुर्‍याएका नेताहरूले नै दमन गरेको उहँको भनाई छ ।  ‘जो नेताहरूलाई तपाईंहरूले बुइँमा चढाई चढाई सबैतिर पुर्‍याउनुभयो, आज वहाँहरूले नै तपाईंहरू माथि गरेको दमनले उहाँहरूको नैतिकता र चरित्रबारे उदाङ्गो पारिदिएको होला,’ उहाँले लेख्नुभएको छ । 

सदनमा र भाषणमा राजनीतिकर्मीहरू जस्तो सुकै गरेर प्रस्तुत भए पनि शिक्षकहरूलाई कसरी हेर्छन् भन्नेबारेमा आजको घटनाबाट प्रस्ट भएको उहाँको भनाई छ । 

पहिले देशको व्यवस्था परिवर्तन गर्न विभिन्न काल खण्डमा योगदान दिएको बताउँदै व्यवस्था परिवर्तन गर्दा देशको नेतृत्व सम्हाल्नेहरूको संस्कार परिवर्तन गर्न असफल भएको उहाँको दाबी छ ।