रुपन्देही । भारतको जम्मू कश्मीरको पहलगाममा मंगलबार बन्दुकधारीहरूको आक्रमणमा मृत्यु भएका नेपाली बुटवलका सुदीप न्यौपाने भएको पुष्टि भएको छ । 

बुटवल उपमहानगरपालिका–१४ का वडा अध्यक्ष दधिराम न्यौपानेले घटनामा आफ्नो भतिज सुदीप न्यौपानेको मृत्यु भएको पुष्टि गर्नुभएको हो । सुदीप र वडा अध्यक्ष न्यौपाने नातामा काका–भतिजा हुनुहुन्छ । सुदीप आमासँगै बुटवल उपमहानगरपालिका–११ कालिकानगरमा बस्दै आएका थिए।

"कश्मीरको घटनामा मृत्यु हुने मेरो भतिज हो, वडा अध्यक्ष दधिराम न्यौपानेले भन्नुभयो, आमा रिमा, बहिनी सुष्मा र भिनाजु उज्ज्वल काफ्लेसहितको टोली शनिबार कश्मीर घुम्न गएका थिए।"

सुदीप धरानमा पब्लिक हेल्थमा स्नातक पढ्दै गरेका विद्यार्थी हुन्। वडा अध्यक्ष न्यौपानेका अनुसार सुदीपबाहेक तीनै जना सकुशल छन्। बाबु कौशल न्यौपाने घरमै हुनुहुन्छ । बुबा पेशाले शिक्षक हुनुहुन्छ । 

मृतक सुदीपको शवलाई बुधबार नेपाल ल्याउने तयारी गरिएको छ। शवलाई कश्मीरबाट दिल्ली र दिल्लीबाट काठमाडौँ ल्याउने तयारी भएकाले आफू अहिले काठमाडौँतर्फ हिँडेको वडा अध्यक्ष न्यौपानेले बताएउनुभयो । 

रुपन्देहीका प्रमुख जिल्ला अधिकारी वासुदेव घिमिरेले पनि कश्मीरको पहलगाममा बन्दुकधारीको आक्रमणमा परेर मृत्यु हुने व्यक्ति बुटवल–१४ का २७ वर्षीय सुदीप न्यौपाने भएको जानकारी दिनुभएको छ ।