कपिलवस्तु ।  शुद्धोधन गाउँपालिकाका अध्यक्ष कमलेशशरण चौधरीलाई लक्षित गरी गोली प्रहार भएको छ ।  अध्यक्ष चौधरीलाई बिहीबार  राति  मायादेवी गाउँपालिका १ स्थित आफ्नै घरको परिसरमा गोली प्रहार भएको हो ।  

अध्यक्ष चौधरीलाई बिहीबार राति साढे ११ बजे शौचालय गएर फर्किँदै गर्दा घरको गेटबाहिरबाट  कसैले गोली प्रहार गरेको कपिलवस्तुका प्रवक्ता डिएसपी मोहनमणि अधिकारीले जानकारी दिनुभएको छ ।

 ‘अध्यक्षज्यूले जानकारी दिए अनुसार शौचालय गएर फर्किँदै गर्दा उहाँलाई घरको गेटबाहिरबाट कसैले गोली प्रहार गरेको रैछ, उहाँ भने सकुशल हुनुहुन्छ’ डिएसपी अधिकारीले भन्नुभयो  ‘घटनास्थलबाट गोलीको खोका पनि बरामद भएको छ ।’

डिएसपी अधिकारीका अनुसार अध्यक्ष चौधरीलाई लक्षित गरी गोली प्रहार कसले गर्यो ? भन्नेबारे पत्ता लागिसकेको छैन । प्रहरीले घटनाबारे विभिन्न तवरले अनुसन्धान गरिरहेको छ । 

शुद्धोधनको अध्यक्ष भए पनि अध्यक्ष चौधरी मायादेवीस्थित घरमा बस्दै आउनु भएको छ ।