भरतपुर । चितवन मिल्कले एक वर्षमा किसानबाट १ करोड १५ लाख लिटर दूध प्रशोधन गरी पाउडर बनाएको छ । संकलित दूध गत सालको चैत मसान्तसम्म उल्लेखित परिमाणमा पाउडर बनाएको हो । 

भरतपुर महानगरपालिका–१ ठिमुरामा रहेको उद्योगले फागुन महिनासम्म दैनिक ४५ हजार लिटर दूध प्रशोधन गरेको प्रबन्धक दुर्गाप्रसाद पराजुलीले जानकारी दिनुभएको  छ  । गर्मी बढ्न थालेपछि दूध सङ्कलन घटेको छ । गत चैतमा दैनिक २५ हजार लिटरसम्म दूध सङ्कलन भएको उहाँले बताउनुभयो । ‘गर्मी बढ्न थालेपछि दहीको खपत बढी हुन्छ’ उहाँले भन्नुभयो– ‘पाउडर र बटर उत्पादनका लागि सङ्कलन  हुने दूध पनि घट्छ ।’

पाउडर र बटर बनाउनका लागि मेचीदेखि महाकालीसम्मका डेरीबाट दूध सङ्कलन हुने गरेको छ । ‘जसले दूध ल्याउँछ उनीहरूले नै उत्पादन भएको पाउडर र बटर लैजाने गरेका छन्’ उहाँले भन्नुभयो– ‘दश दिनसम्म यही ‘कोल्डस्टोर’मा राखिदिने गरेका छौँ ।’ पाउडर दूधे आइसक्रिम र बिस्कुट उद्योगमा खपत हुने गरेको छ ।

विसं २०७२ को भूकम्पपछि ३ वर्ष  बन्द उद्योग पुनःसञ्चालन भएपछि उत्पादन भएको दूध बिक्री नहुने अवस्थाको अन्त्य भएको  छ ।  जिल्ला दूध उत्पादक सहकारी सङ्घका अध्यक्ष किशोर बगालेले दूध प्रशोधन गरेर पाउडर दूध र बटर बनाउँदा किसान लाभान्वित भएका बताउनुभयो ।