काठमाडौँ । काठमाडौँ उपत्यका लगायत मुलुकका विभिन्न स्थानमा बुधबारदेखि भइरहेको वर्षामध्ये सबैभन्दा बढी पानी इलामको बरफल्याङ्ग केन्द्रमा परेको छ । 

जल तथा मौसम विज्ञान विभागले आज दैनिक वर्षाको सारांशसहितको बुलेटिन जारी गर्दै इलामको बरफल्याङ्ग केन्द्रमा एक सय दशमलव दुई मिलीमिटर वर्षा भएको जानकारी गराएको छ । 

विभागका अनुसार बुधबार बिहान ०८ः४५ देखि आज बिहान ०८ः४५ बजेसम्म २२७ वटा वर्षा मापन केन्द्रमा मापन गरिएको  थियो । २४ घण्टाको वर्षाको विवरणअनुसार २१२ केन्द्रमा वर्षा भएको छ ।
 
‘त्यो केन्द्रमध्ये सबैभन्दा बढी वर्षा बरफल्याङ्ग केन्द्रमा १००.२ मिमी भएको छ, वर्षा मापन गरिएका केन्द्रमध्ये ६ केन्द्र (सर्लाही, पर्सा, उदयपुर, रौतहट, सप्तरी, धनुषामा ५० मिमीभन्दा बढी  वर्षा भएको छ) विभागद्वारा जारी दैनिक मौसम बुलेटिनमा भनिएको छ ।
 
विभागअन्तर्गत मौसम पूर्वानुमान माहाशाखाका मोसमविद् हरिप्रसाद दाहालले हाल लुम्बिनी, गण्डकी, बागमती, कोशी प्रदेशका अधिकांश स्थान र कर्णली प्रदेशका केही स्थानमा वर्षा भइरहेको जानकारी दिनुभयो । ‘हाल पश्चिमी वायुको सामान्य प्रभाव छ । आउने शनिबारसम्म बादल लाग्ने सम्भावना छ’ उहाँले भन्नुभयो ।
 
वर्षासँगै वायु प्रदूषण पनि कम भएको छ । ‘एयर क्वालिटी इन्डेक्स’कोे तथ्याङ्कअनुसार बुधबार मध्याह्नमा उपत्यकाको वायु प्रदूषण १७७ एक्युआई रहेकामा आज भने प्रदूषण घटेर १५४ एक्युआइमा झरेको छ ।