भोजपुर । उपप्रधानमन्त्री प्रकाशमान सिंहले मुलुकमा राजनीतिक स्थायित्वका लागि कांग्रेस–एमालेको सरकार गठन भएको बताउनुभएको छ । मुलुकको विकासलाई सरकारले जोड दिएको उहाँको कथन छ ।

भोजपुर नगरपालिका वडा नम्बर ४ दाँवामा रहेको सिद्धेश्वर माध्यामिक विद्यालयको ७७औँ वार्षिकोत्सव कार्यक्रमको उद्घाटन गर्दै  उहाँले यस्तो बताउनुभएको हो । शहरी विकासमन्त्रीसमेत रहनुभएका उहाँले मुलुकको विकास निर्माण र स्थायित्वका लागि  वर्तमान सरकार क्रियाशील रहेको बताउनुभयो ।  

विकास निर्माणका गतिविधि निरन्तर अगाडि बढाउन वर्तमान सरकार क्रियाशील रहेको बताउँदै उपप्रधानमन्त्री सिंहले आगामी वर्षको बजेट सबै वर्ग र क्षेत्रलाई समेटेर बनाउन अर्थमन्त्रीलाई अनुरोध गर्ने बताउनुभयो । 

भोजपुरको शैक्षिक उन्नयनमा त्यो विद्यालयले निर्वाह गरेको बताउँदै भूमिकाको सराहना गर्दै उहाँले उपलव्ध स्रोतसाधनको उचित प्रयोग गर्न शिक्षक कर्मचारीलाई आग्रह गर्नुभयो । 

त्यस अवसरमा नेपाली कांग्रेसका कोषाध्यक्ष उमेश श्रेष्ठ, कोशी प्रदेशसभा सदस्य विनोद बान्तवा, पूर्वअर्थमन्त्री शङ्करप्रसाद कोइराला, जनप्रतिनिधि तथा स्थानीय गण्यमान्य व्यक्ति, अभिभावक, पूर्वविद्यार्थी लगायत सहभागी हुनुहुन्थ्यो ।