काठमाडौँ । जापान सरकारको सहयोगमा निर्मित उदयपुरको कटारी नगरपालिका–१४ लेखानीस्थित चन्द्रावती माध्यमिक विद्यालय भवन हस्तान्तरण गरिएको छ । 

नेपालका लागि जापानी राजदूत मायदा तोरूले नवनिर्मित भवन हस्तान्तरण गर्नुभयो । जापान सरकारको ग्रासरूट ह्युमन सेक्युरिटी प्रोजेक्ट (जिजिपी) को अनुदान सहायताअन्तर्गत करिब ८५ लाख रुपैयाँ सहयोगमा भवन निर्माण गरिएको हो ।
 
त्यस अवसरमा जापानी राजदूत मायदाले परियोजनामा संलग्न सबैको प्रयासको लागि बधाई तथा प्रशंसा व्यक्त गर्नुभएको काठमाडौँस्थित जापानी दूतावासले जनाएको छ ।
 
विद्यालय विसं २०१७ मा स्थापना भएको हो । त्यो विद्यालयमा हाल करिब ३सय ३० विद्यार्थी अध्ययनरत छन्  ।  विद्यालय त्यस क्षेत्रकै प्रमुख शैक्षिक संस्थाका रूपमा रहेको छ ।  विद्यालयमा कक्षा १ देखि १२ सम्म अध्यापन हुँदै आएको छ । जीर्ण विद्यालय भवनका कारण विद्यार्थीको पठनपाठनमा समस्या झेल्दै आएका थिए । 

नवनिर्मित भवनमा सुविधासम्पन्न कक्षा कोठा, छात्राछात्रका लागि बेग्लाबेग्लै शौचालय लगायत सुविधा रहेको दूतावासले जनाएको छ ।