धनुषा । पूर्वमन्त्री तथा आम जनता पार्टीका अध्यक्ष प्रभु साहले  बौधिमाई नगरपालिकाका मेयरलाई  अदालत  परिसरमै मार्ने धम्की दिएको भन्दै त्यसविरुद्ध अवहेलना मुद्दा दर्ता भएको छ ।

पूर्वमन्त्री तथा रौतहट क्षेत्र नम्बर ३ का प्रतिनिधिसभा सदस्य साहविरुद्ध बौधिमाई नगरपालिकाका मेयर प्रदिपकुमार यादवले रौतहट जिल्ला अदालतमा अवहेलना मुद्दा दर्ता गराउनु भएको हो।

पूर्वमन्त्री साहले केही दिनअघि आफ्नो फेसबुकमा  ‘रौतहट जिल्ला अदालतका झोले न्यायाधीश’ भनेर लेख्नु भएको थियो । साहले आफ्ना फेसबुक आइडीबाट ‘न्यायाधीश नेताका झोले कार्यकर्ता’ भनेर टिप्पणी गर्नुभएको हो । 

मेयर यादवले पूर्वमन्त्री साह र आम जनता पार्टीका महासचिव त्रिभुवन साहविरुद्ध गएको शुक्रबार अवहेलना मुद्दा दर्ता भएको हो । मेयर यादवले दर्ता गराउनु भएको मुद्दामा पूर्वमन्त्री साहविरुद्ध अदालत परिसरमा ज्यान मार्ने धम्की दिएको आरोप समेत लगाइएको छ । त्यो मुद्दा आज सुनुवाइ हुँदैछ ।