रुपन्देही । राष्ट्रिय स्वतन्त्र पार्टीका निलम्बित सभापति रवि लामिछाने आज जिल्ला अदालत रूपन्देहीमा उपस्थित हुनुहुने भएको छ । उहाँविरुद्ध सुप्रिम सहकारी ठगीको अभियोग लागेर मुद्दा दायर भएसँगै उहाँ आज अदालतमा उपस्थित हुन रूपन्देही पुग्नुभएको हो ।

उहाँ मंगलबार रूपन्देही आउनुभएको थियो । 

बुधबार १० बजेअघि नै उहाँ अदालतमा उपस्थित हुने तयारी छ। बुधबार नै पेसी तोकेर अदालतमा उहाँको बयान शुरु हुनेछ। बयान छिट्टै सकिए थुनछेक बहस समेत बुधबार नै हुनेछ। बहस सकिनासाथ उहाँलाई थुनामा राख्ने कि थुनाबाहिरै रहेर मुद्दा लड्न दिने भन्ने आदेश हुनेछ।

सुप्रिम सहकारी ठगीमा २२ जनालाई प्रतिवादी बनाउँदै गत आइतबार नै जिल्ला अदालत रुपन्देहीमा पूरक अभियोग दर्ता भइसकेको छ। 

पूरक अभियोगमा कुमार रम्तेल, शिवबहादुर गुरुङ, छविलाल जोशी, रवि लामिछाने, लक्ष्मीप्रसाद पौडेल, दिपक लामा, अनन्तबाबु राई, श्रीवल्लभ नेपाल, शिवप्रसाद पौडेल, वीरबहादुर रानाभाट, विशाल तामाङ, रविना रिमाल, भगवती बम्जन, विज्ञान राई, नरेश जिसी, गितेन्द्रबाबु राई, भुपेन्द्र राई, देवेन्द्रबाबु राई, सागर केसी, नवीन अछामी, असरफ अलि सिद्दिकी र हेमन्त अधिकारीलाई प्रतिवादी बनाइएको छ।