दाङ । तुलसीपुर उपमहानगरपालिका–१२ का खुसीराम चौधरीको बारीमा अहिले लटरम्म गोलभेडा फलेका छन् । प्याजका बेर्ना उम्रिँदै छन् ।

उहाँ  त्यो वडाका वडाध्यक्ष पनि हुनुहुन्छ । वर्षौँदेखि तरकारीखेती गर्दै आएकाले हुनसक्छ कचिला निवासी चौधरीले जनप्रतिनिधि निर्वाचित भएपछि पनि तरकारी खेतीलाई निरन्तरता दिइरहनुभएको छ । 

‘तरकारीखेती हाम्रो पुरानो पेसा हो’  उहाँले भन्नुभयो– ‘म जनप्रतिनिधि भएपनि यो पेसा छोड्न सक्दिन ।’  करिब तीन कठ्ठा जमिनमा उहाँले गोलभेडाखेती गर्नुभएको छ । अन्यमा केराउ, प्याज, लसुनखेती गर्नुभएको छ । चौधरीले जम्मा २२ कठ्ठा जग्गामा वर्षेनी  तीन बाली खेती लगाउने गर्नुहुन्छ । कचिलामा बेमौसमी तरकारी बढी उत्पादन हुन्छ । 

वडाअध्यक्ष चौधरी माघको अन्तिमतिर सिमी, करेला, बोडी, भेडे खोर्सानी रोप्ने तयारीमा हुनुहुन्छ । साउनमा काँक्रा, सिमी  र बोडी रोप्ने गर्नुहुन्छ । असोजमा गोलभेडा, केराउ रोप्ने गरेको उहाँ बताउनुहुन्छ । 

‘जनप्रतिनिधि होस्, या अरु कुनै पेसा व्यवसायमा हात हालेको व्यक्तिले प्रायः खेतबारीमा काम गरेको देखिँदैन’ वडाध्यक्ष चौधरीले भन्नुभयो, “तर, म उत्पादनमा जोडिनुपर्छ, ताकी यो कुराले अरुलाई प्रेरणा होस् ।”  
उहाँले उत्पादन गर्नुभएको तरकारीले उचित बजार भने पाउन सकेको छैन । भारतबाट आयातित तरकारीले यहाँ उत्पादित तरकारीले बजार नपाउने गरेको उहाँको गुनासो छ । चिस्यान केन्द्र नहुँदा यस्तो समस्या हुने गरेको उहाँले बताउनुभयो । हाल कचिलासहित आसपासका वडामा उत्पादित तरकारीलाई बजारीकरण गर्न शितलपुरमा हाटबजार लगाउने तयारी गरिएको छ । 

गोलभेडा, प्याज, लसुन, खुर्सानी लगायत बिक्री गरेर उहाँले वार्षिक ४ लाख रुपैयाँसम्म आम्दानी गर्दै आउनुभएको छ ।  उहाँले राजनीति गर्नेले खाली बस्नुपर्छ भन्ने मान्यता अन्त्य हुनुपर्ने बताउनुभयो ।