काठमाडौँ । सत्तारुढ नेकपा (एकीकृत समाजवादी) निकट युवा संघ नेपालले नेपाल र भारतबीच बिहिबार भएको सम्झौता रद्दगर्न माग गरेको छ । भारतीय दूतावासले २० करोडसम्मका परियोजना पालिकहरुलाई सिधै बाँड्नसक्ने सम्झौता 'राष्ट्रघाती' भएको भन्दै रद्द गर्न माग गरेको हो । 

दूतावासले २० करोडसम्मका परियोजना सिधै बाँड्न सक्ने सम्झौताले नेपाल र नेपाली जनताको सार्वभौमिकता र सार्वभौम अधिकार माथि नै गम्भिर खेलबाड गरेको युवासंघका संयोजक कृष्णकुमार विश्वकर्माद्वारा जारी गरिएको विज्ञप्तिमा उल्लेख छ । 

बिहिबार नेपाल र भारतबीच भएको चार बुँदे सम्झौता मध्ये स्थानियपालिकाहरुमा भारत सरकारले सिधै २० करोड रुपैयाका परियोजना संचालन गर्न सक्ने बिषय उल्लेख छ । सम्झौताको उक्त बुँदा नेपाल र नेपाली जनताको स्वाभिमानीको प्रतिकुल रहेको भन्नै युवा संघले सम्झौता रद्दगर्न माग गरेको हो । भारतसंग भएको यो सम्झौंता यथाशिघ्र रद्द गरी जनतासामु आत्मआलोचित वन्न सरकारलाई सुझाव समेत दिएको छ । अन्यथा  युवासंघले सडक‌ अन्दोलन गर्ने चेतावनी दिएको छ ।