सर्लाही । सर्लाहीमा नेपाली कांग्रेसका कार्यकर्ता र प्रहरीबीच झडप हुँदा १ जनाको मृत्यु भएको छ ।
बरहथवा ६ स्थित प्राथमिक स्वास्थ्य केन्द्र स्तरोन्नतिका लागि प्रदेश सरकारलाई हस्तान्तरण गर्ने नगर कार्यपालिकाको निर्णय कार्यान्वयन माग्दै  कांग्रेससहितका दलले गरेको प्रदर्शनमा प्रहरीसँग झडप भएको हो । 

प्रदर्शनकारीले नगरपालिका कार्यालय तथा नगरप्रमुख कल्पनाकुमारी कटुवालको घरमा ढुङ्गामुढा गरेपछि झडप भएको हो ।  झडपमा बरहथवा नगरपालिका ५ का जयशंकर शाहको मृत्यु भएको छ । स्थिति नियन्त्रणमा लिन प्रहरीले प्रदर्शनकारीमाथि अश्रुग्यास प्रहार र हवाई फायर गरेको छ । प्रदर्शनकारीले नगरप्रमुखको घर तोडफोड गर्दै एउटा चारपाङ्ग्रे गाडी जलाएका छन् ।

झडपमा १ जनाको मृत्यु भएको प्रमुख जिल्ला अधिकारी कोमलप्रसाद धमलाले पुष्टि गर्नुभएको छ ।  गोली लागेर मृत्यु भएको हो वा होइन भन्ने नखुलेको जिल्ला प्रशासन कार्यालयले जनाएको छ । प्रहरीसँगको झडपमा केही घाइते भएका छन् ।